L ie stat la senteda generela dl Schi Club Gherdëina. Sudesfazion y mpëni ntan dut l ann. Ai 6 de juni dala ot da sëira iel stat la senteda generela dl Schi Club Gherdëina. Danter i ponc plu aministratifs, coche l’apruvazion dl bilanz, iel nce unì cuntà dla bela atività, di travierc arjonc y dla ndesfidedes positives. L ie nce stat na premiazion di miëur atlec y dla miëura atletes. L ie unit adalerch truepa jënt. Daujin ala presidënta Lidia Bernardi y l cunsëi, fovel truepa autoriteies, coche l ambolt de Urtjiëi Tobia Moroder, l assessëur per l sport de Santa Cristina Luis Stuffer y chël de Urtijëi Janpiere Prugger, l presidënt dla Cassa Raiffeisen Ivo Senoner, Leander Moroder n reprejentanza dla FISI de Bulsan, l presidënt dl Saslong Classic Club Rainer Senoner, Christoph Vinatzer per la Lies dl Turism de Gherdëina y mo d'autri. Lidia Bernardi à nce dit "L ie n gran lëur che va mé sce duc lëura deberieda. Ma ala fin vëniel bën ora truepa sudesfazion." I NUMERI DL SCHI CLUB GHERDËINA Pra l Schi Club Gherdëina iel al mumënt tesseredes 500 persones cun 1000 cumëmbri:es. L vën spartì tla categuries dl schi alpin, biathlon, pudejé, saut, cumbinazion nordica, freestyle, schialpinism, schi cross y telemark. 220 atlec y atletes ie atifs:ves te 26 grupes de alenamënt y cin' tlasses sportives GENERELA DL SCHI CLUB GHERDËINA La mpurtanza de zidlé l sport da d'inviern tl ITE Raetia. L ie 39 alenadëures cun 24 atlec:tes te scuadres naziuneles desferëntes. 17 pulmins à l ann passà fat zirca 27.500 chilometri per jì a alenamënc, garejedes y nsci inant. L manejamënt de chësta lia à n gran custimënt de n milion de euro che vën manejà per garejedes, trasporc, guant, preparazion atletica y auter. L SKI COLLEGE La cunlaurazion danter la scola auta ITE Raetia ie na cunlaurazion mpurtanta per l Schi Club. Chëst ann festejea la sezion sportiva 15 ani. Scumencià ovel cun 18 sculeies y sculées, trëi alenadëures, trëi grupes de alenamënt y trëi pulmins. La sezion ie chersciuda da stramp y n ie śën al pont che l ie 96 sculeies y sculées, 19 alenadëures, 17 grupes de alenamënt y 17 pulmins. Cumplessivamënter iel te 15 ani stat 306 sculeies:ées sportifs:ves, de chëi y chëles ie 46 jic:tes te scuadres naziuneles. Pra la senteda à nce Bernhard Flatscher, l diretëur dit: "Chësta cunlaurazion che nëus on ie drët mpurtanta, che zidlon drët gën. Cie che vën ora tres chësta ie n prudot de cualità, na merca de cualità sibe tl ciamp sportif che scolastich. L ie mpurtant che i atlec y l'atletes ebe na bona fundamënta nce de istruzion. Nosc model de scola ie n model da mustré inant, trueps tol ispirazion da chësc. L ie na cunlaurazion da plajëi danter n'istituzion publica y na lia." DUC BËNDEBÒ CUNTËNC Ntan la sëira se à nce rujenà i reprejentac dla categuries de sport desferëntes, coche per ejëmpl Karl Heinz Goller per l schi alpin, Edi Piazza per l biathlon o Diego Runggaldier per l freestyle. Danter dut y dut iesen cuntënc cun i resultac y l mpëni da pert de duc i sportifs y la sportives. L ie unì mustrà videos dla grupes de alenamënt, ulache l ie unit ora che daujin al mpëni y al messëi se purvé y vester lezitënc iel nce mumënc da rì y de aurela curta. Sambën iel mo vel' cossa che n uel miuré o vel' aiut che n se damanda. Nscila iel l bujën mé per dì per n purtoi da alenamënt per l schi alpin, che sibe propi resservà mé a chël. Danter n valguna d'autra cosses ài dit che l mancia per ejëmpl la lerch per fé alenamënt a sut, suvënz iesen un daujin al'autra, schicei ite. De n trampolin nuef per l freestyle fóssel ënghe debujën. La presidënta Lidia Bernardi se mostra positiva: "L lëur ne n'ie nia scëmpl, ma dà truepa sudesfazion. Sambën iel nce ponc ulache l ie mo n mumënt de deficulteies o cosses da ressolver, ma son drët cuntënc de coche la va uni ann. Vivon propi de biei mumënc deberieda." L Schi Club Gherdëina ie na gran lia, cunesciuda nia mé a livel de valeda, ma propi nce a livel naziunel. For inò giapel recunescimënc d'uni sort per si merit. Cie che ie mo da dì ie che i atlec y l'atletes che ie pra l Schi Club Gherdëina fej dai ani incà propi de bon resultac, da chël pont de ududa ne se fejen niancanó marueia che la lia ie tan renumeda. Ala fin dla sëira ie mo unii premiei:des i miëur atlec y la miëura atletes de chësta sajon passeda. L ie stat na sajon da truep traverc arjonc, che ti à fat truepa legrëza nia mé ala presidënta y al cunsëi, ma nce ai:la alenadëures, atlec y atletes y duc chëi y chëles che lëura pea. Julia Lardschneider Usc di ladins Irene Lardschneider premieda dala presidënta Lidia Bernardi per si cariera sportiva 51 50 Schi Club Gherdëina 2023-24
RkJQdWJsaXNoZXIy Mjc0Mjk=