NA GRANDISCIMA PASCION, DE GRA PER CHISC BIEI 10 ANI Raphael Runggaldier Ce bel che l fova a fé trainier, chësc possi dì, do che é tëut la dezijion de lascé. Mi ultima sajon da atlet fova tl 2009/10 canche ove 20 ani. Ie fove ruvà a n pont ulache pensove do, sce chësc ie bën l drët y sce son bën bon assé. Canche n scumëncia a pensé de massa, pona iel miec lascé ajache la streda ie dura y sce n ne à nia ueia de fé sacrifizies pona ne vala nia. Nsci ovi tëut la dezijion de me fermé y ie posse mé regrazië de dut chël che é mparà te mi pitla cariera sportiva. Ie rate che tres l jì cun i schi ne mperen nia mé a se alené y a deventé miëures sun i schi ma nce a sté danter jënt, a savëi da se cumperté te vel’ situazion nia saurida y a se arangë. Puech do, cun 21 ani, ei scumencià a fé l maester de schi y n me ova damandà sce ësse ulù tenì l curs “FISI”. L me savova n bel mat a ti nsenië ai pitli y l é fat dal prim di cun na grandiscima pascion. Puech do ei ënghe fat l curs da trainer, ulache é pudù mparé truep leprò y tl medem mumënt ei scumencià a fé l trainier dl schi club: l plu bel lëur che me pudova capité. L ie suënz stat darì y é mparà scialdi sun co me cumpurté cun i mutons. Te 10 ani da trainier ei udù duta la categories: cuccioli, ragazzi, allievi, juniores y chël ie stat na gran fertuna. I plu biei mumënc per n trainer ie canche n atlet furnea bën cun i schi y n vëij coche l devënta miëur da di a di. For ne vala nia dl viers de coche n s’l pënsa, ma te chisc mumënc ruva pona ora l atlet che crëia te sé nstës y ie inò bon de se mëter sun la drëta streda. La roba plu burta per n trainer ie canche n si atlet se fej mel, levé su ne n’ie nia for saurì ma ti ani ei udù che duc chëi che crëia te sé nstësc, chëi leva su y ruva de reviers plu stersc de dant. De mumënc darì nen iel stac ngrumon: jì cun i “Bergroller”, fé downhill cun la roda y cianté te pulmino plu adaut che la va. Da trainer ei abù la fertuna de pudëi festejé n valgun suzesc. Ma l majer suzes ie canche i mutons mpera y vën gën a trainieren, pona ruva nce i resultac. I resultac muessa ruvé canche n ie tl categoria aspiranti/juniores, ajache iló ai n valor ulache n possa pona udëi sce l schi devënta n mestier o mé n hobby. Ma unfat coche la va, n muessa for dé dut per nia messëi n di o l auter pensé do che sce n ëssa fat deplù pona fossen stac boni. L trainier ei fat ajache l me ëssa for sapù bel ti de zeche ai mutons dl post y cun i mutons ei for abù na hez mata. De fé l trainer ei lascià ajache l fova deventà massa n gran mpëni. Ne fove nia plu bon de mëter a jì dut danter familia, lëur y schi club. Son cuntënt che é abù l unëur de pudëi fé l trainer dl schi club. Dut chël che i autri trainer me à nsenià ne me desmënci nia. Possi mé dì che l schi club cun duc si trainer fej n boniscimo lëur: duc i trainer a na pascion mata y se prova a ti dé l miëur a si atlec. Chësc ie n valor che è udù te puec autri schi clubs y rate che perchël sons suënz, sce nia for, i miëures. Spere che tl daunì ruva do ngrum de trainer jëuni ajache l ie n beliscimo lëur, n possa mparé scialdi y n possa mé vester cuntënc che n l à fat. Raphael Runggaldier ex trainadëur 37 36 Schi Club Gherdëina 2023-24
RkJQdWJsaXNoZXIy Mjc0Mjk=