I ALENAMËNC CUN L SCHI CLUB GHERDËINA Giuana Prugger Ie é for bele abù na gran pascion per l sport. Bele da jëuna fajovi plu sortes de sporc agonistics danter l auter tennis, schi, juech al palé y scioh. Tla segonda tlas dla scola auta ei tëut la dezijion de jì inant cun l juech al palé y pona sons, tla terza tlas, jita a Minca, ulache è fat n ann pra l U17 dla mutans dl FC Bayern München. Canche son ruveda inò de reviers ei fat n ann pra l FC Südtirol un ann tla Serie A y un tla serie B, dan che son jita tl’America a studië pra l’università de Bridgeport, ulache é pudù studië y fé l juech al palé pra la scuadra dl’università che ova inuem Purple Knights. Canche é finà via, sons pona jita a Dispruch, ulache é fat l stude de “Lehramt”. A Innsbruck ei jugá 6 ani pra l FC Wacker Innsbruck te Bundesliga dl Austria. Davia che tl’Austria muessen studië doi materies, ei cris ora sport y la rujeneda russa. Nsci fovi nce plu iedesc a St. Petersburg a fé cursc de rujeneda y é nce pudù fé pea vel’ training y vel’ partita cun na scuadra de chësta beliscima zità. Do che ovi finà de studië sons ruveda de reviers te Gherdëina, ulache é scumencià a nsenië tla scola mesana de Urtijëi y é seurantëut na grupa dl Schi Club Gherdëina. L schi club me ova damandà sce ue alené na grupa y l’idea me savova debota nteressanta. Dal prim mumënt me à sapù bel a alené, danter l auter ajache n possa se dé ju cun de bon atlec y de bona atletes che à na gran ueia de fé sport. Chël ie segur una dla cosses plu beles per uni alenadëur:a, udëi coche si atlec:tes devënta miëures se purvan pra uni alenamënt. N possa udëi che uni alenamënt à si mpurtanza y che sce vel’ atlet:a mancia plu suvënz vëijen riesc na desferënza danter chël:a che à mancià y chël:a che che fova for. La presënza, custanza y l mpëni ntan i alenamënc à na gran mpurtanza. Ai atlec y ala atletes, dantaldut sce mo jëuni y jëunes, muessa ti savëi bel i trainings per pudëi dé dut y per unì gën al alenamënt. Sce n muessa i sfurzé ne ti sal nianca bel y leprò ne iesi dessegur nia boni de se purvé al mascimo. Śën iel bel l cuinto ann che alenei na grupa di mëndri dl Schi Club Gherdëina. É scumencià cun na grupa di cuccioli nasciui dl 2009 cun chëla che é fat inant per doi ani. Do chisc doi ani ei fat inant cun la grupa di 2011, chëi che alenei mo for. L ie na beliscimo grupa de 16 mutons y mutans, duc cun na gran pascion, ueia y truep ntujiasm. L ie nce na grupa bëndebò flescibla, cun chëla che n possa fé dl dut, danter jì samont a pe o cun la roda, jì a purvé a sauté cun i schi sun Monte Pana o nce stajan tl ciamp Mulin da Coi. Chësc ie nce l bel de alené l schi alpin, ulache te ies liede de fé cie che te ues y purvé ora d’uni sort de sporc o ativiteies nueves. Chëst ann fan nce al mer, a Lignano, a fé n camp ntensif de 4 dis de alenamënt. L ann passà ons per l prim iede purvà a fé n alenemënt d’instà n puech autramënter. Mpede fé l alenemënt tlassich de doi iedesc al’ena, ons purvà a fé n’ena de training ntensif (danmesdì y domesdì) y n’ena ulache i atlec possa mpue paussé y fé d’autra ativiteies, coche Pavël, jì samont te medel, jì al mer y nsci inant. Chësta idea nes ie unida ajache l fova for truepa assënzes ntan l instà y nsci ons pensà de dì bele danora, de fauré, che ntan chësta enes d’instà saral training y che i atlec dëssa vester presënc. Nsci fovela pona ënghe y tan’ che deguni ne à mancià. Muesse dì, che chësta maniera de alenamënt à scialdi butà y nce ai atlec y ala atletes ti al sapù dassënn bel, aldò dla nrescida fata do l instà. Oradechël pudoven purvé a fé 4 sporc desferënc de nosc schi club (l saut cun i schi, l biathlon, l freestyle y i rollerblades). N gran rengraziamënt va sambën nce ai alenadëures di autri sporc, che se à tëut dl’aurela de nes mustré si sport. La segonda ena fans trëi dis al lech dl Garda, ulache son jic cun la berca a vëila doi dis y l terzo di sons jic a Caneva, cie che ti à sambën sapù beliscimo. I ultimi dis ons fat l training tla valeda. L’ultima ena sons jic sa Marëufer a durmì te tenda sun Col Ciarnacëi, ulache l chemun de Urtijëi nes à metù a desposizion si bela utia. N juebia y vënderdi de chël’ena sons mo jic a crëp y a fé tennis y bouldern. L fova propi de bela enes ulache nia me i atlec y la atletes à mparà a se cunëscer miec, ma nce nëus alenadëures on udù manieres de se astilé nteressantes y nueves de nosc atlec y de nosta atletes. L ie dassënn mpurtant che i mutons y la mutans mpere da pitli insù a fé d’uni sort de sporc, per miuré la capaziteies de coordinazion. A pië via dal instà 2022 fajons i trainings cun la categories di cuccioli, chël uel dì cun i mëndri, a na maniera de svilupé si capaziteies di coordianzion y per ti mustré sporc nueves. Giuana Prugger Preparazion atletica 33 32 Schi Club Gherdëina 2023-24
RkJQdWJsaXNoZXIy Mjc0Mjk=