Canche l ie inò ëura de scrì l articul per la brosciura se rendens cont che l ie bele inò passà n ann. N ann cun ngrum de ntraunides, cun suzesc y delujions. Cun de biei mumënc y de pitla crises, cun atlec che à lascià y de nueves che ie ruvei leprò, ma plu che auter n ann de sudesfazions per traineri, atlec y genitoresi. L’ultima sajon fova per la sezion dl biathlon na sajon drët garateda. Sibe dai jëuni cun l stlop a aria, che dai majeri cun l calibro 22 iel unì arjonc de boniscimi resultac. Danter l auter n titul talian, 4 tituli provinziei, 5 partecipanc al “3-Länderwettkampf”cun 3 podiums, l 3. post tla tlassifica generela a scuadres y bën 6 atlec che cun la bona prestazions dl ann à ie stac boni de ruvé ite tl comitat provinziel. Dut chësc ne vën sambën nia dal nia, tlo iel for inò nosc 7 traineri dovia che cun pascion, legrëza y lezitënza se dà ju cun i atlec y chël nia mé d’inviern. Cun l training a sut iel bele unì scumencià de mei via, fajan mé na pitla pausa canche duc va mpue al mer y scumencian po de lugio inò cun l stlupeté. Sambën che per pudëi stlupeté iel dant da njinië ca l poligono te Val, che d’inviern iel raidà de un n viers, ma d’instà iel da stlupeté te n’autra direzion, scenó ne à chëi che va a crëp ilo nia na drëta legrëza cun nëus. SEZION DE BIATHLON Nsci se tol nosc traineri ënghe mo su chël lëur y do avëi cuncià su dut bel a puntin, passa la vaces che ie n pastura te Val, bat ntëur sagomes, zera la cordes y lascia sambën ënghe mo vel pitl lecord sun pra… y po iel da fé su inò dut da nuef. Ma chisc stroc à pa bën na fin, canche l vën a s’l dé l poligono nuef sun Pana y aldò dl assessëur Luis Stuffer, che se cruzia dassënn de chësc proiet y ti sta dovia, messëssela pa tosc vester tan inant. Chël purtëssa scialdi de miëura cundizions de training a nosc atlec y povester fossel monce puscibl mëter a jì na gara a livel provinziel cun l stlop a aria per ti fé udëi ala jënt tan nteressanta y emozionela che possa vester na gara de biathlon dal vif, ënghe una fata da pitli atlec. Nchin che la ie tan inant, metons mefun a jì uni ann inò nosta garejeda danter nëus ala fin dla sajon, la “Biathlon gaudi”, che coche n aud bele dal inuem, ie uni ann na cumedia y n suzes bestia. De gra ënghe a Arnold che nes dà for dassënn na man. Ma nchin che chëla vën inò a s’l dé, sons mo jic inant cun l training a sut y do doi gares de biathlon da instà che à dassënn butà, cialons cun positività y otimism ala sajon che vën, speran sun n bel inviern, na drëta pascion per l biathlon, legrëza a fé sport y la drëta bocs. Edi Piazza Respunsabl biathlon Edi Piazza 123 122 Schi Club Gherdëina 2023-24
RkJQdWJsaXNoZXIy Mjc0Mjk=