25/11/2024
Ski Club Gherdëina - società Campione d'Italia
L Schi Club Gherdëina ie inó unì premiá sciche l mieur Schi Club dla Talia
N ucajion dla “FISI- Night 2024” y la presentazion de duta la garejedes dl sport da inviern, tl Felsenkeller tla Laimburg ai 22 de nuvëmber à l Schi Club Gherdëina Raiffeisen Gherdëina inó pudù pië do cun gran legrëza la unëranza, n pest veramënter de prestisc de Schi Club Campion Talian.
La unëranza ti ie unida sëurandeda ala presidënta dl Schi Club Gherdëina Lidia Bernardi dal presidënt dl Comitato de Südtirol Markus Ortler sun ncëria dl presidënt dla FISI nazionela Flavio Roda.
Per vëncer chësc titul vën valutei plù criteries de merit, ma dantaldut i resultac di atlec te duta la disciplines: schi alpin, freestyle, saut y cumbinazion nordica, biathlon, pudejé y telemark.
Oradechël à l Schi Club Gherdëina arjont tl schi alpin n generel y tla ativitá di jëuni l prim post tla tlasifica taliana.
Chësta ie na beliscima recunescënza y na gran sodisfazion per i cunselieres dl Schi Club Gherdëina che dà ca truep de si tëmp liede, per i trainadëures che njënia ca i atlec y sambën ënghe per duc i atlec y duta la atletes, dai mëndri a chëles che garejea bel a aut livel nternaziunel.
Sambën che nce per la FISI de Bulsan y per dut Südtirol iel for n gran uneur che bel da ngrum de ani va l recunescimënt dl mieur sci club Talian a na lia sportiva de Südtirol.
