27/05/2024
Giuana Prugger trainadëura dl ann 2024 VSS
Uni ann unerea l VSS, l cunsorz dla lies sportives dl Südtirol (Verband der Sportvereine Südtirols), una na alenadëura y un n alenadëur cun chësta uneranza. Tlo vën cunscidrei duc i/duta la alenadëures, de duta la disciplines sportives che l VSS pieta.
Chëst ann à la jëuna de Urtijëi giapà la uneranza, per si meric straurdineres tl lëur cun i jëuni y la jëunes dl FC Gherdëina y SC Gherdëina. Giuana ne savova danora de dut nia. Si familia, cumpanies y la reprejentantes y i reprejentanc dl FC Gherdëina y dl SC Gherdëina ie stac boni dla fé unì al NOI Techpark de Bulsan per pië do la uneranza. Tla foto vëijen Giuana cun si mutons y la mutans dl Skiclub Gherdëina che à judà a ti fé la surpreja, rendan la sëira mo plu senificativa per ëila.
Giuana y l sport
Giuana ie for stata na gran sportiva, bele da pitla insù. Cun 5 ani ala scumencià a jughé a Hockey, njuntan pona l Tennis, l Schi Alpin y l juech al palé, che ti savova n bel mat. Ne ulon nce nia desmincë l sport dl Scioh, ulache la à fat pea i campionac te Südtirol y taliani, deventan campionëssa taliana Under 10.
Giuana y l juech al palé
Bele da pitla à Giuana scumencià a jughé al palé pra l FC Gherdëina cun i mutons, dan che la ie jita cun 12 ani pra l SG Schlern, ulache i ova na scuadra de mutans. Tosc à nce d’autra scuadres udù l talënt de Giuana y nsci iela ruveda a jughé n iede te Serie B pra l Vintl y pona te Serie A pra l FC Südtirol.
Ntan l 3. Ann dla scola auta àla fat n ann tla scola sportiva dl FC Bayern, ulache la á jugà tl FC Bayern mutans U17. Dan la matura a Urtijëi ala for judà pea da trainadëura pra l FC Gherdëina.
Do la matura tla ITE Raetia à Giuana giapà n stipendium y nsci l‘ucajion de jughé te n college tl‘USA, ulache la à jugà doi ani cun Brightport, tl Connecticut, tl campionat di College Americans.
Cun 21 ani iela pona ruveda de reviers y à scumencià a studië Sport y Rus tla Università de Dispruch. Ntan chisc 5 ani de stude à la jugà tla 1. liga dl Austria cun l Wacker Innsbruck. Danterite à ëila nce fat na esperienza jugan al palé te na scuadra russa a S. Petersburg.
Do si stude ie Giuana deventeda nsenianta de sport tla scola mesana de Urtijëi, fat l curs y passà l ejam da alenadëura per l juech al palé (UEFA B) y fat la trainadëura pra l FC Gherdëina, la scuadra dl FC Südtirol U17 mutans y sëurantëut per l Schi Club Gherdëina i alenamënc a sut per i mëndri.
Giuana y l daunì
N possa dì che Giuana à bele sën n curriculum sportif de prim livel, ma ëila ne à mo giut nia assé. Chëst ann d’ansciuda ala scumencià a alené na scuadra di Special Olympics a Urtijëi y d’autonn scumëncela cun doi autri gran mpënies per l mond dl juech al palé: Ëila sarà una dl alenadëures per i jëuni y la jëunes che a crì ora l juech al palé tl prugram „School & Sport“ che la ITE de Urtijëi pieta a scumencé dal ann de scola 2024-25 y la sëurantol la scuadra de mutans, che vën metuda a jì per l prim iede te Gherdëina, sun si scumenciadiva (co pudëssel pa nce vester autramënter).
Cun chësta risses uel la lies de Gherdëina rengrazië Giuana per si lëur ezelënt cun i mutons. Ëila ie n ejëmpl per duc i mutons y duta la mutans che la alenea!
