07/12/2019
Beliscima sëira de prejentazion dla scuadres y dla brochure
DE GRA a duc nosc SPONSORES * DANKE allen SPONSOREN * GRAZIE a tutti gli SPONSOR
Presentazion de duta la scuadres dl schi club Gherdëina cun si alenadëures sun plaza Stetteneck a Urtijëi
N ucajion dla 23ejima edizion dla brosciura nueva dl Schi Club Gherdëina ie chësc liber anuel unì presentá ai 7 de dezëmber l marcià da Nadel a Urtijëi.
Mpuë dan la 6 dassëira ie duc i atlec cun si alenadëures furní sú drët da catif, duc medimi cun i guanc dl schi club, piei via da plaza S.Antone te na desfileda nchina su sun plaza Stetteneck. L ie stat beliscimo a udëi duc chisc mëndri y majri ruvé sun na plaza plëina de jënt, genitoresc, apascionei dl schi, simpatisanc y autoriteies.
Dó che Ellis Kaslatter á cherda su sun palch per paroles de salut l ambolt de Urtijëi Tobia Moroder, l presidënt dl Comitat dl Sport da inviern Markus Ortler y l Assesseur provinziel Daniel Alfreider ië unì presentá dut l cunsëi dl Schi Club cun si presidënta Lidia Bernardi che á rengraziá duc canc per si gran leur che i fej y si mpëni per l schi club.
Pona ie jic su sun palch danprovia duta la scuadres y si alenadëures. Dai pitli dl schi alpin nchina ai granc dl alpin, i atlec dl pudejé, chëi de biatlon y dla cumbinazion nordica y sambën ënghe la scuadra de freestyle. Uni grupa y uni atlet se á presentá personalmënter cun na drëta fantasia. Chësc ie stat zeche de nuëf che ala jënt ti à plajú dassën.
