95 Per arjonjer de bon resultac d’inviern ons scumencià l instà cun n valguna nuviteies per fé a na maniera che son boni de se njinië ca ala miëura maniera puscibla per la sajon da d’inviern. I granc, chëi che fej na scola auta, se à alenà deberieda cun i biatlec te na gran grupa. Davia che l nen fova ngrum, fova chisc mutons acumpaniei da doi trainadëures. Nsci ons pudù auzé la cualità di alenamënc ma on nce pudù fé alenamënc particuleres sciche la raida di 4 pasc cun i skiroll, l Stelvio cun i skiroll y vel’ gara de sauté. Suvënz sons jic sun l Lavazè, ulache l ie unida metuda su na pista da skiroll nueva. Tla grupa di pitli, chëi dla scola mesana, ons d’instà scumencià cun enes de alenamënt. Mpede fé via per dut l instà 3 alenamënc al’ena; nen ons mé plu fat 1 al’ena. Ma perchël ons tla 4 enes de alenamënt, spartides su sun dut l instà, fat uni di danmesdì y domesdì alenamënt. Chest ann ons purvà a fé nsci ajache danter vacanzes, Sakl y d’autri mpënies, manciova for vel’ un al alenamënt. Te chësta 4 enes sce ntant ne manciova mei deguni y a chësta maniera pudans se alené scialdi. Chësc à butà dassënn. D’autonn ons pona inò scumencià a fé 3 alenamënc al’ena. L autonn ie per nëus n tëmp plu rie per se alené ajache i mutons à ngrum de mpënies danter scola y d’autra ativiteies. Leprò vëniel bel plan massa frëit per jì cun la roda y cun i skiroll. Perchël ans deficulteies cun la cualità y cuantità de alenamënc. Ma on abù la fertuna che bele i prims de nuvëmber al nevët assé per jì a pudejé y nsci sons da un n di al auter passei dai skiroll ai schi. Chësc nes à dessegur dat n vantaje tla gares d’inviern ajache nia uni schi club ova la puscibltà de mudé via sun i schi tan abenëura. I alenamënc ons n gran pert for fat sun Monte Pana ulache an for na pista njinieda ca a puntin. Sun Monte Pana ons ënghe laurà cun l “avviamento nordico”, cun i mutons dla prima elementera tres l proiet MUDA y cun vel’ tlas dla scola elementera de S.Crestina. Nsci iela stata che sun Pana fovel for ngrum de mutons y mutans a se devertì sun i schi da pudejé. De resultac ne ulëssi nia rujené plu che ntant davia che chël ie per mé nia tan mpurtant sciche l devertimënt y l mparé cosses nueves, chësc dantaldut tla categories plu basses. Chël che ie da auzé ora ie che nia mé un o doi atlec fova boni de arjonjer de bon plazamënc, ma che duc fova sun n bon livel n cunfront ai autri. Mé nsci sons stac boni de stlù ju al prim post tla categoria di schi clubs a livel provinziel. Son ënghe stac boni de avëi la miëura stafetes tla categories di baby y ragazzi. Leprò ons arjont la bedaies d’arjënt tla stafetes di cuccioli y di allievi. Ala fin muessi dì che l plu cuntënt sons che duc i mutons y duta la mutans fova lezitënc/lezitëntes y se presentova a uni alenamënt cun truepa legrëza. Silas Demez RELAZION SUN LA SAJON 2023/2024 SCHI CLUB GHERDËINA 2024/25
RkJQdWJsaXNoZXIy Mjc0Mjk=