39 2024/25 de Milan. Ntan la sëira àn nce lecurdà mo n iede i miëur resultac de chësc inviern. VELES DL CUNSËI NUEF Trëdesc fova i candidac sun lista, trëdesc ie ruvei ite te cunsëi. Chisc ie i inuemes che fajerà pert dl cunsëi nuef: Lidia Bernardi, Karl Heinz Goller, Edi Piazza, Georg Rabanser, Angelo Senoner, Christian Broll, Stefan Kostner, Simon Demetz, Alex Linder, Gerry Demetz, Diego Runggaldier, Irene Verra y Stefano Devecchi Bellini. I doi ultimi ne fova nchin śën mo nia te cunsëi, perchël ài nce giapà l mesun de se prejenté n curt. Davia che duc i candidac fossa ruvei ite te cunsëi, àn mé fat na vela pro forma, prian bel duc canc de auzé la man. Chi che fajerà l presidënt o la presidënta unirà fat ora pra la prima senteda dl cunsëi nuef, ma aldò de nosta nfurmazions à la presidënta Lidia Bernardi mustrà si nteres de fé inant, perchël resteràla plu dessegur inant a cë dl Schi Club Gherdëina. Nia plu leprò l vizepresidënt da dant, Werner Dejori, che à, do dodesc ani de cunsëi y da respunsabl de sezion, ulù de ju chësta ncëria. “Sambën ne n’iel nia saurì a abiné de nueves, ma gran pert dl cunsëi resta pu l medemo, pona ne n’iel niancanó n gran problem per i nueves a zapé ite y a sëurantò vel’ lëur”, nes à cuntà Werner Dejori, che resterà inant respunsabl dl zënter sun Pana y per chësta rejon uniràl tëut ite te cunsëi, ma mé plu per la cosses che à da nfé cun l zënter de pudejé y saut. Cuoptei nce Armin Kasslatter, Sara Moroder y Petra Kasslatter. L MARKETING IE NA PERT MPURTANTA Ntan la generela à na firma nce prejëntà si prugram de marketing. Chësta firma fajerà da sponsor ala lia y se cruzierà de dut chël che à da nfé cun l marketing, dai socials ala publica relazions. Na pert mpurtanta per na lia tan granda y che tol nce lëur, dantaldut sce n muessa s’l fé nstës y ne n’ie nia dl mestier. Cun chësc var spéren de ruvé a na prejënza ti media mo plu prufesciunela. Simon Peter Moroder
RkJQdWJsaXNoZXIy Mjc0Mjk=