189 Chësc articul me ëssi mpensà de scrì permò do i juesc Olympics de Milano-Cortina. Ma me é rendù cont che stluje na porta per nen giaurì plu na bela. Sambën ne iel nia saurì a lascé l sport. Ala fin sons apasciunei dl sport. Datrai possa chësta pascion ënghe deventé n pëis, na identità, n messëi fé resultac. Da pitli insù cialons ai atlec che vënc y perchël ulons ënghe nëus vëncer. Ciuldì? Ajache l ie bel. Ma nia mé chël, l vëncer dà da maië a nosc Ego, nosta aspetatives crësc y ulon vëncer for inò y inò. Miëures che son y plu che la jënt ntëur ite nes dà valor, sponsors, trainadëures, media, jënt y l ne n’ie nia for saurì a ti vester a chësc. Te scumënces a valëi velch y uni un uel n toch de té. Dant o do se n va i resultac y la jënt riesc do. Per chësta gauja ie l valor dl sport da chësc pont de ududa na ilujion. Ne fajëde nia sport per pensé de valëi deplù sce sëis boni o vencëis. Che suinsom dla scela nen iel una che va ju y n’autra che va inò su. Suinsom stes mé per puech tëmp y la emozions che proves te chël mumënt ne posses nia tles tenì. Fajëde sport ajache l ie na bela scola de vita, ajache l ie BEL. Son cuntënt dl bel viac che é pudù viver y l fajësse for inò. Sambën per avëi plu suzes ëssi messù mudé vel’ cossa ma ntan che n viv tla “bolla da vita da atleta” ne se rënden nia cont de ngrum de cosses. Ma la ie jita nsci y mparà ei ngrum. Mutons y mutans, fajëde sport a livel aut, ne lascëve nia mëter sot da chiche uel ve mëter sot y sce sëis boni de ve devertì l plu che la va, mantenian for na prufescionalità auta, po arëis un di plu biei tëmps de vosta vita. Gudëve uni training, uni garejeda cun l obietif de miuré uni di. Criede te vo nstësc che sëis boni de deventé i miëures al mond y lecurdëve che valëis deplù de mé n resultat. De gra y saluc dal’America Samuel Costa SAMUEL COSTA, 30/11/1992 Nazionale Italiana dal 2007 al 2023 2 partezipazions ai Juesc Olimpics 8 partezipazions ai Campionac dl Mond 197 garejedes de Copa dl Mond cun 4 iedesc sun l podest THE ILLUSION OF PERFORMANCE SCHI CLUB GHERDËINA 2024/25
RkJQdWJsaXNoZXIy Mjc0Mjk=