Schi Club Gherdëina Raiffeisen - 2024/25

183 CUNËSCER PLU DAUJIN SARA THALER Chi ie pa Sara Thaler? Chësta ie na dumanda che vel’ un/a se à dessegur fat, ajache da pitla ne sons mei stata una che ulova tumé tl uedl y ne fove ënghe mei tan bona de jì cun i schi, che n ëssa scumencià a rujené de mé. Permò ti ani passei, canche mi resultac ie deventei miëures, an scumencià a me cunëscer. Ma cie dij pa resultac de na persona? Perdrët nët nia y perchël uei ve cunté zeche de mé nstëssa a na moda che pudëis me cunëscer mpue miec. Scumencià a jì cun i schi ovi coche uni un/a, ntëur ai 3 ani, canche mi genitores me à metù sun i schi y da iló inant, me al for sapù bel assé, per ti jì do a chësta pascion. É scumencià cun n valgun cursc de jì cun i schi, pona sons ruveda tl schi club y ala fin ei cris ora de fé la scola auta ITE Raetia tla sezion sport per pudëi jì inant cun l schi. De chisc ani ne iel nia truep da cunté: ne fove mei stleta, ma ne ësse ënghe mei drë venciù garejedes. I me dijova for che ovi tan de “margine” (potenzial per me miuré) ma do ani che ne fove mei drë bona de fé de gran vares inant, ovi scumencià a pensé: “cie me juda pa avëi potenzial sce dantaldut tla garejedes ne sons nia bona de tré ora deplù?” N gran var ei pona fat canche doi trainadëures me à juda a crëier te mé nstëssa y mi talënt. É abù la fertuna de abiné jënt che a credù te mé scialdi de plu de chël che ie fajove. Y chël à mudà DUT! Perchël uei lecurdé a vo duc (trainadëures, genitores, cumpanies) che vosta paroles possa mudé scialdi deplù de chël che ne pensëis! Pona sons stata un n ann tl comitato y l ann passà me ai tëut su te scuadra naziunela B. Pensan che l fova mi prim ann te scuadra, sons stata scialdi bën bele dal scumenciamënt inant. Da una na pert ne iel nia stat n ann tan saurì, ajache é pudù jì puech cun i schi per gauja de na nflamazion ala tibia, ma dal’autra pert fovel la sajon plu bela de for. La garejedes tla copa europa ie jites scialdi miec de chël che me ësse aspità y pona ei mo pudù fé mi prima garejeda de copa dl mond y chël fova propi beliscimo. Do chësta sajon me ai pona tëut su tla scuadra A, ajache fovi bona de me davanië l post fis per la copa dl mond, ruvan segonda tla juissa tla copa europa. Pudëi me alené cun la miëures dl mond ie dastramp bel, ajache n possa mparé scialdi. Vester te chësta scuadra ie zeche che ne ësse mei pensà che l pudëssa vester puscibl. Ma propi perchël uei lecurdé a duc, dantaldut ai atlec mo plu jëuni, che ne messëis nia for vester i miëures bele da pitli insù. L mpëni y la pascion ie scialdi plu mpurtanc y me à purtà a pudëi fé chësc siche lëur, fajan pert dl grup sportif di Carabinieri. Pudëi trasfurmé mi pascion te n lëur y pudëi fé uni di chël che feje l plu gën ie la cossa plu bela che me ie suzeduda! Per chësta sajon me ei tëut dant de fé truepa beliscima esperienzes y dantaldut de me goder uni mumënt te chësc ambient nuef. Tres chësta risses ëis pudù cunëscer mpue miec mi storia y spere che fove ënghe bona de ve dé pea zeche. Dantaldut speranza per i atlec y la atletes che vën do. Cun n gran mpëni y truepa pascion possen realisé si sëmies! Sara Thaler SCHI CLUB GHERDËINA 2024/25

RkJQdWJsaXNoZXIy Mjc0Mjk=