108 La sezion dl biathlon ie chëst ann metuda adum da bën 37 atlec y atletes spartii su te 4 grupes. Dla prima grupa, chëla dl “avviamento” ulache l ie laite nosc mëndri y nosta mëndres, se cruzia Matthias Runggaldier deberieda cun Karin Moroder. Pra la grupes U12 y U14 cun l stlop a aria, se cruzia Theo Senoner y Luigi Ponza dl stlupeté ntan che Stefan Zelger y Irene Lardschneider lëura sun la tecnica; d’autonn inant ie mo ruveda leprò Gaia Brunello a se dé na man. Tla grupa Calibro 22, nosc majeri atlec y nosta majera atletes, ie Samuel Mussner la persona de referimënt per l poligono y Armin Kasslatter se cruzia dl rest. Muec cun l training a sut sons bele de mei y ntan dut l instà iel unì fat n training scialdi ntensif y che mudova for ju: jites da mont su, roda, skiroll, forza, coordinazion y dantaldut devertimënt. Nsci sons danter l auter nce jic a gusté sa Pieralongia, on fat na “spaghettata” da Alexia Runggaldier y ntan i dis a Forni Avoltri ne manciova mei la bona ueia. Chësc vel nce pra nosta “Biathlongaudi”, ulache genitores possa se museré al poligono, ruvan sëura che l ne ie mpo nia tan saurì tuché da 10 metri de destanza n pitl busc de 1,5 cm. Ma chësc ti ie garatà drët bën a nosc atlec y a nosta atletes tl’ultima sajon. Dai resultac udons che nosc traineri à fat propi n boniscimo lëur. Te chësc cuntest iel da auzé ora l titul talian dla stafeta dl’ëiles U17 cun la grupa metuda adum da Tanja, Thea y Anna, sëuraprò mo d’autri tituli talians tla stafetes y ti singuli, 3 tituli de campion/ëssa provinziel/a, podiums tla “Coppa Italia”, na vënta al “3 Ländervergleichskampf” y mo d’autri beliscimi resultac; duc chisc nes à purtà a n 2. post storich tla tlassifica naziunela, lascian do nëus luesc mpurtanc sciche Antholz y Ridnaun. Nia mé dai resultac vëijen l bon lëur di traineri, ma nce tla ueia y pascion che i atlec à, a fé chësc bel sport che apasciunea mpue duc, jëuni y manco jëuni y nsci ons uni ann atlec y atletes nueves che vën do. Chëst ann nen fovel bën 6 de nueves pra chëi che mët man (avviamento), 1 pra l stlop a aria y 2 pra l calibro 22; chisc ie de tei che à mudà disciplina y ie ruvei dala combinata nordica. Danz che cun tan na gran cumpëida de atlec fossel bon nce avëi na strutura aldò, ma savon che te Val iela coche la ie y sun Pana, ulache rengrazi dassënn l assessëur al sport Luis Stuffer che se cruzia scialdi per nes fé avei n poligono lassù, uderons cie che unirà a s’l dé. Ntant cialons cun positività ala sajon che vën, savan de avëi fat na bona preparazion y se ncunfurtan sun la prima garejedes. Ulësse mo rengrazië i traineri per si bon lëur, la sezion dl pudejé per la bona cunlaurazion, l zënter sun Pana per la pistes for a puntin d’inviern y sambën vo genitores che sustenieis vosc mutons a fé sport. Spere de pudëi nce tl daunì for fé cont cun l aiut di genitores, ajache mé tenian adum y se judan un cul auter puderons ti pité nce tl daunì dut chësc a nosc mutons y nosta mutans. De gra y bona sajon a duc. Edi Piazza SEZION BIATHLON SCHI CLUB GHERDËINA
RkJQdWJsaXNoZXIy Mjc0Mjk=