Schi Club Gherdëina Raiffeisen - 2021/22

Depënc abinei te ciavernes tla Norvegia documentea che bele dan 5.000 ani se muova la jënt sun schi per jì a ciacia: na sort de biathlon primitif. Ma la ravises dl sport dl biathlon ie da abiné dantaldut tl ambient militer. Bele i Vichings se defendova cun suzes tl nord dla Norvegia sun i schi da si nemics. Tl medieve fova po’ la trupes asveltes sun i schi y chëstes ne fova nia plu da pensé demez da uni armeda scandinava y russa. Tl 18. centené se à l sport dl schi svilupà deventan la disciplina plu mpurtanta tl mond militer dl’Europa dl nord, ma nchin ala fin dl 19. centené univa la combinazion de schi (pudejé) y stlupeté mé adurveda per fins militeres y de ciacia. Nsci ënghe mo tla prima y segonda viera mundiela. Permò dal 1910 ie chësta combinazion unida recunesciuda coche disciplina sportiva dl militer per alené i saudeies y ie pona unida tëuta su coche disciplina desmostrativa pra i Juesc Olimpics dl 1924, 1928, 1936 y 1948. Dl 1930 ie unida purteda ora per l prim iede, pra i Campionac dl Mont dl militer, na garejeda a scuadres sun i schi cun stlupeté. L univa mo stlupetà a na destanza de 100 m cun de gran stlops y stlupetà univel sun palons d’aria cun laite n polver da culëur per udëi miec sce l palon stlupova canche l univa tucà. Do la segonda viera à pona l biathlon, inuem che vën dal grech y che uel dì “doi disiciplines”, scumencià a se slargë ora nce tl mont zevil. Permò dl 1960 ie l biathlon unì tëut su ufizialmënter pra i Juesc Olimpics de Squaw Valley (USA), ma mé sciche disciplina di ëi. Dal 1979 iel unì scrit dant de stlupeté cun de mëndri stlops cal. 22, mé a 50 metri y sun cërtli de fier che se stluj y devënta blanc sce n i toca. Sambën ie chisc cërtli al didancuei scialdi mëndri di palons da ntlëuta. Per n bunder, à la munizion che vën adurveda n diameter de 5,6 mm y ruva ora dal stlop a passa 300 m/s (1.080 km/h). Per se stravardé da periculi tl manejé chësta ermes, iel tl biathlon truepa prescrizions da tenì ite. Ënghe la tecnica dl pudejé à abù si svilup. Ntan che nchin ala fin di ani ‘70 fovel mé la tecnica tlassica, se à tl biathlon da iló inant la tecnica liedia desmustrà for plu y plu adateda, ënghe per via dla sauridanza de purté l stlop. Bën tosc an lascià vester la tecnica tlassica, tant che al didancuei vën la garejedes de biathlon mé plu purtedes ora tla tecnica liedia (skating). 30 ani de biathlon pra l Schi Club Gherdëina La storia dl biathlon dl’ëiles scumëncia ufizialmënter permò dl 1981 cun na garejeda nternazionela a Jáchymov tla Cecoslovacchia. Dl 1984 ie unic purtei ora i prim Campionac dl Mont per ëiles. Tl 1992 a Albertville vën la prima ëila curuneda campionëssa olimpica de biathlon. L biathlon dl’ëiles se à svilupà scialdi debota, da arjonjer bele do puec ani la medema mpurtanza dl biathlon di ëi. Ntant à chësc sport abù n grandiscimo svilup de nteres y di media sëuradut te chisc ultimi ani y ie ti Paejes Tudësc bele al segondo post coche sport plu cialà tla televijion do l juech al palé. Chësc ie n numer de marueia a pensé che nstës à mé puecia persones la puscibltà de fé ativamënter chësc sport. La storia de chësc sport te Gherdëina ie bën mpue plu curta: pra l Schi Club Gherdëina ie l sport dl biathlon unì tëut su coche sezion dan ades 30 ani, canche Simon Demetz da Pilat se ova tëut la bria, do che l ova venciù na bedaia d’or pra i Campionac dl Mont a Lahti tla Finlandia, de mëter su na grupa de mutons y mutans y ti nsenië chësc sport. Ntant ie ënghe la sezion scialdi chersciuda, coche perauter dut l muvimënt dl biathlon mundiel, coche on liet. Al mumënt sustën l Schi Club Gherdëina cater grupes de biathlec, da chëi che scumëncia ai majeri che pudëssa bele fé l saut tla scuadra naziunela o te na grupa sportiva militera. La sezion dl biathlon dl Schi Club Gherdëina cumpëida al mumënt belau 40 atlec, che se semieia bele giut na luegia cun n poligon mpue plu modern y adatà de dan 30 ani. Purempò ie te chisc ani dla sezion dl biathlon tl Schi Club Gherdëina sautei ora ngrum de bon atlec y de bona atletes che se à fat unëur cun de bon resultac a livel naziunel, ma ënghe cun resultac de marueia a livel nternaziunel ora per l mond. Olympia 1924, Chamonix 102 SCHICLUB - GHERDËINA 2021|22

RkJQdWJsaXNoZXIy Mjc0Mjk=