05/02/2017
Trofeo „Leitgeb“ tla valeda de Pfitsch
4. garejeda per i jëuni atlec dl biathlon a livel provinziel
L’ultima dumënia ie tla pitla valeda de Pfitsch, unida purteda ora la quarta garejeda de biathlon che valova per l trofeo “Leitgeb” sun n blot mplant nuef.
Chësc iede ne ti ala a plu atlec de Gherdëina nia tan butà a stlupeté, ma npò ie sautei ora n valgun dré de bon resultac. Tla categoria cuccioli dla mutans ti ie Nina Nocker rueda dassën daujin a si solita aversera da chëst’ann, al segondo post y chissà sce la ti garata bel tla proscima garejeda nce dla bater.
Tla categoria ragazzi dla mutans se à Samira Goller davanià cun trëi de bona serien pra l stlupeté l bon sesto post. Nona ie ruveda Miriam Lardschneider. Cuntënt cun si resultat possa nce vester Patrik Nones che tla medema categoria di mutons ie ruvà undescejim.
Pra la majra mutans ie Denise Planker ruveda quinta, ma segonda de si ann. Ylvie Perathoner, ënghe dl 2003, ie ruveda undescejima, quarta de si ann.
Coche bel scrit tl ultim articul iel da se fé marueia ce valor che à arjont l biathlon. A chësta garejedes tol pert danter 160 y 180 atlec danter i 9 y i 15 ani. L ie for plu sozieteies che tol pert a chësta garejedes y “belau” dutes à na bela luegia adateda da se alenè.
Proscimo fin dl ena jirà i mieures de chisc atlec dl Piemonte a Chiusa Pesio a fé i campionac talians, ulache ti drucon sambën dassën i punies. ts
