16/01/2017
Doi vizecampiunësses provinzieles de biathlon te Gherdëina
Miriam Lardschneider y Nina Nocker ruva segondes tla Val Badia
N dumënia ai 15.de jené ie unic purtei ora sul nuef mplant da biathlon a S.Ciascian i campionac provinziei de biathlon tla specialità Sprint.
L Schiclub Raiffeisen Gherdëina se à presentà cun 13 atlec, danterlauter cun vel un che fajova si prima garejeda o scialdi de jëuni. Ma iust chisc à sapù da sla fé valëi dassën stlupetan drët bën arjunjan de mieur resultac che n se ëssa aspità da ëi.
Doi mutans ie states bones de zapé sul segondo scialier dl podio davanian l titul da vizecampionëssa provinziela. Nscila Nina Nocker de Sëlva, che se vizieia cun de bon resultac tucan duta diesc la scipes y Miriam Lardschneider, che nes à fat la bela sorpresa falan me un n colp.
Da numiné ie nce i bon plazamënc de Samira Major, quinta cun un n fal y Samira Goller sesta cun doi fai; ma sambën na lauda a duc nosc atlec per si gran mpëni y ulentà.
Da laudé ie nce la perfezion de coche i ulenteresc dla Val Badia a metù a ji chësta manifestazion, per nia dì dla nvidia che nëus de Gherdëina on de si bel mplant che ie unì a sl dé bele al scumenciamënt de si atività, a vester che nëus de Gherdëina assan bele da 25 de atività cun l Schiclub Gherdëina y messon mo for se alené te n prà.
