alpino

15/01/2020

Garejeda de slalom strënt “Landescup a Taisten”

Mike Rifesser vënc


Dumënia daduman, tò ca l‘auto y furné do a chisc mutons ora te Gsies…
Ora de Gherdëina su a Mühlbach y ite per Puster nchin a pië su te Gsies.
Taisten ie me n doi raides da iló su. Suinsom l lift ie bel levà l surëdl, pra l pitl lift dl luech iel bel na drëta coda, la pista ie bela blancia y plata sciche na mëisa.
Ce bel di che l vën, l surëdl leva y mëina via na lum drët sterscia, japé iel mo na drëta dumbria y monce mpue frësch, la nëif bela frëida y schi ciga…
Nscila iel mefun bel a pië via a fé na gara…

Duc chisc mutons granc y mëndri ruva su dan pro via cun i trainadëures per jì a se cialé ju la gara de slalom strënt. L ie cuncià su dut a puntin, l Schi Club de Taisten a inò n iede urganisà drët bën chësta blota garejeda. La nëif ie bela dura y la gara ënghe mesanmenter ria.
Dan pro via pea ju duta chësta mutans y mutons a se cialé ju i pei coche i ie cuncei su, mpue strënc y mpue n do l’auter, la va de se lecurdé coche l ie cuncià su, uniun uel bën sambën rué ju y mo debota.

Sambën i nosc ie anjiniei, i mutons y la mutans dl 2007 cun Alex y Roby, mpue i majeri dl 2006 cun Karl y Wolfgang uel se mustré tan boni che i ie.
La gara pea via, la prima manche y pona la segonda manche.

Do la prima manche, iel sën bën n valgun de nost mutans y mutons dan ora,
Insam Jessica, Testa Marianna, Avesani Lisa.. les possa mo ti vester, y nosc mutons, Rifesser Mike y Linder René, possa mo ti la peté, Merler Luca y Demetz Colin ie ënghe mo ti primes 10.
Udëi coche la va te la segonda manche, la pista tën drët bën, l surëdl ie aut y l ie iusta mo nia ciaut, drë a drët per fe mo na bela segonda manche. L vën ino cialà ju, sën furnea i mutons sun l tracciato ulache la mutans à fat la prima manche.
Sën vala de tënì permez mo n iede, nosta mutans y mutons mostra duta si grinta y furnea ju la segonda manche. Ala fin, dala mutans ruva Insam Jessica per puech sun n boniscimo 4 de 71 mutans che ie ruedes ju. Dai mutons ie Mike Rifesser che cun si gran forza ti la mostra a duc y vënc la gara cun 5 centesimi dan ora, René Linder te l cuarto post y ti 10 ie ënghe mo Luca Merler y Demetz Colin.

Bravi ai atlec dl Schi Club Gherdëina, inant nscila.

Per l Schi Club Gherdëina
Angelo Senoner

Sponsor

Raiffeisen Gherdeina
ITC Raetia sezion Sport GherdëinaCentro Fondo S.Cristina

Foto

Facebook