22/07/2015
Prima garejeda NG a Pellizzano tla Val di Sole
N sada iel stata la garejeda de saut y cumbineda y n dumënia mo una me de saut.
N po' di che nosc atlec se à cumpurtà scialdi bën, purtan a cësa n grum de vëntes y plazamënc ti primes trëi. La cuncurënza tla Talia ne ie nia scialdi granda, la cumpëida de atlec che pratigea chësta disciplina ie do la rata pitla nce a cunfront a autri paejes.
Purempò cëla nosc trainadëur dassën ala cualità y ala tecnica de uni singul atlet, per pudëi pona te n daunì teni pea a livel internaziunel.
Sce ti cialon ai resultac dla garejedes de Pellizzano pona possun auzé ora n valgun atlec:
Ethan Senoner ie stat bon de vëncer n sada sibe la gara de saut che nce chëla dla cumbineda. Chësc tla categoria di mutons nchin a 11 ani.
Diego Malsiner ie stat l miëur tla cumbineda de n sada, fajan na bela proa tl sauté. Tlo fovel da fé na raida de ades 3000 metri. Ël garejea tla categoria di majeri. Tla medema categoria se à Daniel Moroder purtà a cësa tramedoi vëntes tl saut, for me de puech, dan Mattia Galiani, Diego Malsiner y Robin Runggaldier. Te chësta categoria mancel belau dl dut la cuncurënza dl autra scuadres, purempò dejmostra chisc mutons de avëi de boniscima qualiteies per ji inant nce a livel nternaziunel.
Pra la medema categoria dla mutans udon Jessica Malsiner che a venciù n dumenia l saut y Daniela Dejori terza.
Tla categoria di mëndri se à Camilla Comazzi inò fat valëi, batan nce sce me de puech, si cumpani de scuadra Manuel Senoner tla gara de saut de n dumënia.
Da nunzië ie senzauter mo doi atlec scialdi pitli, Anna Senoner y Maximilian Gartner, che à fat n sada si prima garejeda de cumbineda nordica se batan scialdi da jnait.
La proscima garejeda sarà ai 9 de agost sun Pana cun na bela partecipazion nce de scuadres dl Tirol.