05/01/2018
Mattia Galiani campion talian de saut sota 16 ani
N sada 30 de dezëmber iel stat a Pardac na garejeda de saut y cumbinazion nordica ulache à tëut pert mutons y mutans danter 8 y 16 ani. La garejedes di atlec sota 16 ani valova per l titul talian y propi te chësta categoria ie stat Mattia Galiani l miëur cun doi sauc de 92,5 y 98,5 metri y 223 ponc. Segondo se à tlassificà Daniel Moroder cun 203 ponc.
Pra la mutans udon n terzo post de Jessica Malsiner, nce sce n muessa di che la prima doves ie sautedes scialdi plu lonc dla nostes y che la va de lauré mo scialdi per ti ruvé permez.
Pra i mutons plu jëuni fova chësta proa la prima de chësta sajon da inviërn, proa che vel per la garejedes nazioneles di jëuni. Cun dejplajëi muëssun cunstaté che l numer de atlec che tol pert a chësta garejedes ie tl lëur de ji de reviëres, do che l fova stat de bon ani danter l 2013 y l 2016. Purmpò cëla l Schiclub Gherdëina de lauré inant y de purté si atlec a n bon livel. Sce ti cialon ai resultac pona possun bën auzé ora la bona prestazions de Florian Schmalzl y de David Moroder, segondo y terzo tla tlassifica di jëuni sota 10 ani. Tla cumbinazion nordica ai pona mantenì si posizion.
Pra i mutons sota 12 ani udon che Camilla Comazzi ie stata la miëura sun l pitl saut da 20 metri. Manuel Senoner à arjont l cuarto plazamënt. Ël se à refat sun l majer saut de 35 metri tla garejeda sota 14 ani, ulache l ie ruvà terzo. Venciù a tlo Samuele Comazzi cun doi de biei sauc. Ël ne fova nce nia da bater tla proa de cumbinazion nordica, avisa sciche si sor Camilla.
Ala fin pudon mo di che l Schiclub Gherdëina se à purtà a cësa la tlassifica a scuadres cun 1420 ponc. N cumplimënt a Joy Senoner, jëun trainadëur de nosc atlec, che ne fova mo nia dl dut cuntënt cun si mutons ma che dajerà dut per i purté mo plu inant.
La proscima garejedes sarà permo de fauré a Pelizzano tal Val di Sole.
