21/02/2017
Manuel Senoner campion talian de saut U12
N sada y dumënia 18 y 19 de fauré fovel a Tarvisio la 5a tappa dla garejedes naziuneles jeuni de saut y cumbineda nordica. La proa de saut di mutons sota 12 ani valova per l titul naziunel y perchel cun mo plu valor. Propi te chësta categoria pudon auzé ora l bel resultat de Manuel Senoner, che cun doi boniscimi sauc ie stat bon de se purté a cësa l titul talian. Che Manuel ie te n boniscimo mumënt an udù sun l majer saut, l HS 35, ulache l à arjont n terzo post da maruëia. Tlo al garejà cun mutons che à nce trëi ani deplù de ël.
Sce cialon mo i resultac dla cumbineda di mutons sota 12 ani pona udon Camilla Comazzi al sgondo y Manuel al terzo post.
Tla categoria sota 10 ani se à Maximilian Gartner plazà al terzo post, Anna Senoner ie ruveda cuarta y Florian Schmalzl sesto. Tla cumbineda udon che Anna à arjont l terzo post y Maxi l cuarto.
Passon ala categoria dla mutans sota 14 ani ulache udon Lena Prinoth la miëura sibe tl saut che tla cumbineda. Pra i mutons dla medema età udon Samuele Comazzi cun doi cuarti plazamënc tl saut y tla cumbineda y David Senoner doi iëdesc al decimo post.
Sën saral per belau n mëns deguna garejeda per pona purté ora la finela tlo te Gherdëina. Mplu unira ino purteda ora la Internazionale Kindertour, ulache l vën adalerch n grum de pitli atlec dl Austria y di Paesc Tudesc. Cun chëla manifestazion unirà stluta via l'atività da d'inviern.
