12/09/2012
Gara de saut y cumbinazion nordica sun Pana
N dumënia 9 de setëmber à l Schi Club Gherdëina sezion saut y cumbinazion nordica urganizà na gara sun Monte Pana. L se à scrit ite set scuadres, danter chëles nce una de Innsbruck. Bel da duman abenëura univa adalerch i pitli y bel mpue majri atlec per fe l saut de proa sun i Sauc H 21 y H 35. L cënter de Monte Pana ië stat njenià cà a puntin dal vize president Klaus Insam, cun n grum de ëures de lëur, dantaldut de sië y rumé su. Nscila fovel propi scialdi bel pudëi mëter a ji na garejeda sun chësta bela infrastrutura. Plajëi se à nce fat la presënza de l vizepresident dla Fisi, Reinhard Schmalzl. Cun gran cumpetënza y savëi al acumpanià ntan dut l di la manifestazion, fajan l speaker. Da numiné iël nce la pesënza de Ivo Pertile, diretëur tecnic dla nazionale de saut y cumbinazion nordica. La gares à scialdi butà, l livel tecnic fova de gran valor y nscila ons udú de bela prestazions.
Dala doi domesdi ië pona pieda via la gara de sauté. I atlec messova muever aldo dla prestazion dla gara de saut. Cun na formula aposta univa rapurtei i ponc dl saut te n tëmp da muever do l prim. Tlo ië garatedes de bela garejedes. Dantaldut Aaron Kostner, che ië muet cun 40 segunc do l prim, ië stat bon de l pië y nsci vëncer la garejeda. Mattia Galiani à recuperà na posizion y ië rua terzo te si categuria.. Nia da bater fova nce Gabriel Moroder, che a venciù pra i plu pitli. Na lauda va fata nce a duc i autri atlec dl Schi Club Gherdëina. Ëi se à cumputà scialdi bën y se à davanià l segondo post tla tlassifica dla scuadres.
N gran gra va sambën a duc i genitoresc, che à metu a ji la cësa da fuech cun gran cuer y savëi. Nscila on pudú ti de da maië a duta la scuadres. Dut chësc fossa nia mesun mëter a ji, sce l ne fossa nia ulenteres che se mët a disposizion a judé. Tlo pon auzé ora la presënza de nosc atlec dla nazionale, Mattia y Lucas Runggaldier, Armin Bauer y Samuel Costa, che se à judà cun de plu pitli lëures a fé garaté la manifestazion.
