28/08/2019
Bela prestazions dla scuadra
Monte Pana - garejedes de saut y cumbinazion nordica
N dumënia ai 25 de agost iel stat la cuarta tappa dla lingia de garejedes naziuneles per jëuni sun Monte Pana. Dala 10 daduman scumenciova la garejeda de saut per i mutons sota 10 y 12 ani sun l saut HS 21. Leonie Runggaldier ie stata la miëura dla pitla mutans cun doi biëi sauc.
Pra i mutons on udù na bela prestazion de Noè Broll. Ël à arjont l cuarto post che ëssa pudù vester mo miëur sce l ëssa dat sëura miec pra l prim saut.
Pra i mutons sota 12 ani à Maximilian Gartner dejmustrà de avëi miurà dassën dantaldut tl de sëura fajan n bel telemark. Ël ië stat l miëur di mutons dan Gabriel Haller. Chësc pitl atlet ie de Ridnaun ma ël se alenea cun nosta scuadra y à fat de gran vares inant dantaldut sun l pitl saut. Nce Florian Schmalzl à fat de bon sauc che ti à purtà l cuarto post.
N segondo post à arjont Anna Senoner pra la mutans sota 12 ani sun l pitl saut y n terzo tla garejeda sun l majer saut. Si fra Manuel Senoner fova n dumënia nia da bater. Ël ie stat l mieur di gran mutons sun l saut HS 35 cun doi sauc de gran valor tecnich y stilistich.
Do la garejedes de saut iela jita inant cun la cumbinazion nordica. I mutons mussova fe na raida sautan plu o manco lonc, for aldò dla categories.
Leonie à manteni la prima posizion dl saut y à nscila purta a cësa doi copes.
Noé Broll se à mo laurà inant y à arjont n bel terzo post. Pra i mutons sota 12 ani ons trëi atlec dla scuadra dl Schiclub Gherdëina sun l podio. Gabriel dan Florian y Maximilian.
Manuel Senoner ie stat l mieur nce tla cumbineda.
Do la garejedes on dat ora da maië, de bona lianies pratedes da Ugo Demez y dëuciaries fates dala umans de nosc atlec.
Chëst’ann on ulù lascé demez la plastica y de gra al chemun de S. Cristina, che se a metù a disposizion taieresc y pestech, sons stai boni de fe vëiramenter puech refudam.
Ulësse rengrazié duc y genitores che se à dat na gran man y che à fat scialdi garaté chësta manifestazion.
WD
