11/08/2015
Bel di de sport sun Monte Pana
N dumënia 9 de agost ie unida purteda ora la segonda tappa dla garejedes per jëuni „nazionale giovani“ de saut y cumbineda nordica sun Monte Pana.
Cun n beliscimo tëmp y na bela cumpëida de atlec ala dut ntëur butà. La scuadres dl Innsbruck Berg Isel y chëla da Absam à dat n valor sëuraprò ala manifestazion. Nce la presënza de Elena Runggaldier à fat gran plajëi y dantaldut i pitli atlec à abù na gran legrëza cun ëila.
Sce cialon coche la ie jita ncont de resultac, pona possun inò vester scialdi cuntënc cun nosc atlec:
Tl saut udon che Manuel Senoner à venciù tla categoria di mëndri dan Camilla Comazzi, tramedoi dl Schi Club Raiffeisen Gherdëina. Tla categoria do se à Samuele Comazzi tlassificà al segondo post dan si cumpani de scuadra Ethan Senoner. Pra la allieves ie Jessica Malsiner stata la miëura, n boniscimo terzo post à arjont Lena Prinoth. Nia da bater ne fova Daniel Moroder, che à dejmustrà de vester n gran forma y che à batù la cuncurënza sterscia de Innsbruck.
Per la garejeda de cumbineda pudon auzé ora chisc resultac: Camilla Comazzi à arjont l terzo plazamënt pra i pitli. Tla categoria di mutons à Ethan Senoner lascià udëi na beliscima garejeda de sauté, trajan ite plu de vint secunc sun l prim iel stat bon de vëncer. Samuele Comazzi à arjont la terza posizion.
Scialdi cumbatuda fova la garejeda tla categoria di alieves. Daniel Moroder à tenì giut la prima posizion, pona ti ie passà dant Diego Malsiner che semiova bel de avëi venciù, ma Jonas Schuster de Innsbruck à tla ultima pert dla garejeda auzà dassën l ritm y ti ultimi trënta metri al mo batù Diego. Terzo ie restà Daniel, cuinto Robin Runggaldier y sesto Mattia Galiani.
Per la tlassifica dla scuadres à l Schi Club Raiffeisen Gherdëina batù la cuncurënza cun 1516 ponc dan l Innsbruck Berg Isel cun 875 y l Monte Giner cun 614 ponc.
Na gran lauda ti va a duc i genitores che à judà dut ntëur a fé garaté chësta manifestazion.
La proscima tappa de chësta lingia de garejedes sarà de setëmber a Pardac tla Val de Flëm.
