05/03/2019
8° Memorial Simona Senoner
Bel per l otavo iede à l Schiclub Gherdëina metù a ji l Memorial Simona Senoner, garejeda de saut y cumbineda nordica, n lecord dla jëuna atleta de S. Cristina morta ai 7 de jené 2011.
N dumenia 3 de merz se à ancuntà duta la scuadres dla Talia per purté ora l ultima tappa per chësc inviern.
Per la categoria sota 12 ani se tratovela di tituli taliani, perchël fova chësta garejeda mo de majera mpurtanza. La à dut ntëur butà, la cundizions atmosferiches fova ideeles, la neif à teni scialdi ben y deguni ne se à fat mel. Mplu iel unit adalerch na bela cumpëida de pitli atlec de Innsbruck, nscila fovel n drë busiamënt tl Zenter Monte Pana.
N à scumencià cun la garejedes sun i doi sauc y riesc lessù la proa de pudejé per la cumbineda. Daldo pudova duc i atlec ma nce i treneri y genitores se maie na bona liania che ie ntant unides anjniedes ca da Ugo Demez cun l aiut de n valguna umans. Nscila an pudù se senté adum ntan che l univa fa ju la tlassifiches. Nteur la trëi domedi iel uni teni la premiazion, ulache fova presënc i assessëures dl sport de S. Cristina y Urtijëi, Luis Stuffer y Ivan Senoner, y l rapresentant dl VSS de Gherdëina Oskar Insam. L majer plajëi à fat la prejenza ntan dut l di de Aaron Kostner y Lara Malsiner, che fova mo l di dant a Seefeld a garejé pra i campiunac dl mond, y che se à teut la bria de uni a judé a meter a ji nosta garejeda. Nce Manuela Malsiner ulon rengrazie per l gran leur de scri sun computer duc y ponc y duta la tlassifiches. Chesta presenzes ti da n gran valor a chësta pitla garejeda. L ie bel a pudëi ste adum cun chisc atlec de livel mondiel.
Sce ti cialon n curt ai resultac pona pudon di che nosc atlec se à cumpurtà do la rata scialdi ben. Da auzé ora ie Manuel Senoner che dejmostra de vester l miëur tl saut ulache l davania dantaldut cun si beliscima tecnica. Nce tla cumbineda se defëndl scialdi ben. L ie me sta batù da n atlet scialdi majer y de n an plu vedl de ël.
Tla categoria dla mutans sota 10 ani udon Leonie Runggaldier y Elena Pasti che ie ruvedes prima y segonda, sibe tl saut che nce tla cumbineda. Florian Schmalzl à arjont n segondo plazamënt tl saut y l terzo tl cumbineda. Medemo resultat à arjont Anna Senoner tla categoria sota 12 ani dla mutans. Auzon ora l prim post y nscila campion talian Gabriel Haller de Ridnaun. Ël vën for a se alené cun nosta scuadra sun Pana y nce sce l ne fej nia pert de nosta lia iel mpo un de nosc atlec. Nscila ie per chisc mutons y mutans fineda via la sajon da inviern. L unirà sautà inant nchin che la cundizions l lascia pro, daldo fajran na pitla pausa per pona scumencé i alenamënc da instà.
WD
