15/09/2015
Sexten: Garejeda de stlupeté y “Mini Drei Zinnen Alpin Run“
N sada, ai 12 de setëmber, iel stat te Sexten na garejeda de stlupeté per mutons y mutans dai 8 ai 14 ani. Nce l Skiclub Gherdëina cun l trainadëur Samuel Mussner à tëut pert cun doi grupes dla sezion dl Biathlon a chësta garejeda. L tëmp fova bel y la temperatures da d’istà. L “Schießstand” fova sun na plaza da parché i auti y uni atlet messova stlupeté 20 colps. L ie da dì che nosc mutons y nosta mutans s’à cupurtà scialdi bën, jan a vëncer cun Ylvie Perathoner, Elia Demetz y Riffeser Michael si categuries. Podesć iel nce unì arjonc da Denise Planker(2), Sophia Planker(3) y Nina Nocker(2) pra la mutans y da Raffael Insam(3) pra i mutons. Boni ie nce stac i resultac di autri atlec: Huber Elisabeth( 6), Major Samira(8), Samuel Prinoth(6) y Nones Patrick(6). N po mé speré che nce d’inviern vëniel stlupetà nscila. Domesdì ie pona nosc pitli atlec jic a cialè pro la 18. edizion dl "Drei Zinnen Alpin Run", na garejeda de sauté da mont su che cherda for adalerch trueps atlec da dut l raion dl’Elpes. La garejeda mesura 17,5 km y ie dassënn sfadiëusa. Gran pert di atlec ie atlec che tol pert mpue dut l ann a garejedes de chësta sort, danterite iel sambënzënza nce atlec che ne à nia tan na gran preparazion atletica. Per chisc ultimi possa na tel garejeda deventé n tel pitl “calvario”.
Davia che n dumënia messova nosc mutons inò garejé, iesen stac sëuranuet te Sexten. N ne n’à nia durmi te n bel liet, ma te n “sacco a pelo” te na palestra. Na sperienza per vel un dl dut nueva, ma dessegur nia burta.
Coche bele dit fovel l di do inò da garejé pra na garejeda che bele da plu ani vën metuda a jì paralel ala “Drei Zinnen Alpin Run”. L se trata dla “Mini Drei Zinnen Alpin Run”, na garejeda per mutons y mutans dai 8 ai 14 ani. De ndut muessa i mutons sauté bën mé dai 500 ai 1400 m, mé che chël ne uel dì nia. Duc chëi che tol pert dà l mascimo y canche i passa l traviert iesi tan che finei.
Da auzé ora iel l 1. post de Gaia Brunello y l 2. de Riffeser Michael. Da di iel nce che gran pert di mutons y dla mutans che à tëut pert a chësta garejeda de sauté fej pert de n grup sportif de atletica y perchël à chisc doi resultac mo n majer valor. (fl)
