10/02/2020
Or ai campionac talians de biathlon per Nina y Tanja
Bon resultac per l SC Gherdëina tla valeda de Pfitsch.
Inò scialdi butà ti ala ai atlec de Gherdëina pra i campionac talians de Biathlon tla categories ragazzi y allievi purtei ora tla valeda de Pfitsch. Bën passa 220 atlec, seuradut dl nord dla Talia, e ruei tla valeda do la rata puech cunesciuda.
A nosc atlec ti ala bele l prim dì, pra la garejeda ndividuela butà dassën. Bele riesc tla prima categoria dla mutans se mustrova Wanker Thea dassën competitiva tucan tla prima doi serien duc i colpsc y jan dassën debota sui schi. L’ultima serie á i nierves pona npuech lascià do y Tanja à falà 3 colpsc te un n iede. Puremo ie sauteda ora la bedaia de bront de gran valor. Stersces ie states ënghe Nina Nocker che ie ruveda 15. cun 4 fai y Thea Wanker 17. cun 5 fai. Duta trëi fova danter la plu stersces sun i schi. Pra i mutons n bon 18. post per Aaron Galiani cun 4 fai. Da auzé ora ie nce l bon 11. 4lazamënt cun 4 fai de Insam Sandra tla categoria dla alieves.
Nteressantes y dassën spetaculeres fova pona l segondo dì la staffettes. Pra la alieves fova cun Nina y Tanja bën 2 atletes de Gherdëina tla prima staffetta dl Südtirol y bel mpont ieles cun si cumpania Ranalter Melanie states bones de vëncer l titul nazionel purtan a cësa 2 bedaies de or. Belau che Thea Wanker ëssa mo davanià cun si staffetta la bedaia de bront; me n valgun secunc ti manciova per ji sul podio. L medemo ti garatova belau ënghe a Aaron Galiani cun si cumpanies. Ëi ie ruei 5., ma ënghe me 11 secunc do i terzi.
Nscila ie finedes via la garejedes a livel nazionel cun Tanja Wanker al sgondo post tla classifica generela de si categoria; n resultat da n valor scialdi aut per l sciclub Gherdëina. ts
