03/02/2019
Campionac talians de biathlon „ragazzi“ y „allievi“
Puec secunc per na bedaia!
N sada y dumënia ie unida purteda ora a Chiusa Pesio la prima pert di Campionac Talians de biathlon dla categories plu jëunes. Do n viac scialdi lonch, se tratovla de fé na garejeda sprint y una a nseguimënt.
Do che n ova bele udù n valgun resultac positifs a livel provinziel, ne iela tlo nia stata autramënter. Tla categoria dla „ragazze femminili“ doi resultac che fej scialdi plajëi: quinta, a me 4 secunc dal podio, ie ruveda Tanja Wanker y 7 secunc do al ottavo post Sandra Insam, tramedoves senza fai. Chisc resultac fajova speré positivamënter per la garejeda dl dì do a nseguimënt. Inò ie la mutans states scialdi stersces, ma purtruep ne ala nia bastà per arjonjer l podio. Inò quinta se à tlassificà Tanja Wanker, chëst’iede cun un n fal y riesc do ie ruveda sesta Sandra Insam, davanian doi posizions, senza fai a stlupeté.
Scialdi plajëi à fat l quinto post de Samuel Ploner tla categoria „allievi maschili“ a 20 secunc dal podio. Ël à l prim dì tucà duc i colpsc, chël che ne ti ie nia plu jita fata l segondo dì y chësc ti à custà l podio. Samuel à purempo davanià na posizion ruvan al boniscimo 4. post.
Ulon te chësta ucajion nes cumplimenté cun chisc atlec per chisc resultac de marueia, ulache cun n pue‘ de fertuna ëssa nce pudù sauté ora nia me una na bedaia de aut valor. Ma dré tan da laudé ie nce i autri atlec, a chëi che chisc dis ne ti ala nia tan butà, ma che pudrà se refé tla proscima garejedes. Tei resultac vën me a sl dé sce i atlec tën adum te na bela grupa, se mutivan un l’auter a vester for lezitënc y se trajan su canche la ne buta datrai ënghe nia.
Chisc bon resultac dëssa sotrissé la bona colaborazion tla sezion nordica dl sciclub Gherdëina: duc i biathlec vën alenei dai trainadëures dl pudejé y ënghe per chisc dëssl vester n premio per l bon lëur fat. (ts)
