17/02/2019
Campionac provinziei de biathlon a Ridnaun
Nina Nocker devënta vize-campionëssa provinziela
Cun n belscimo surëdl y n ciel sënza nibla, ie n dumënia 17. de fauré unic purtei ora i campionac provinziei de biathlon per la categories cun l stlop a aria te Ridnaun.
L se tratova tlo dla garejeda ndividuela ulache uni atlet muessa fe 3 o 4 raides aldò dla categoria y stlupeté 2 o 3 iedesc. Per uni colp falà giatova i atlec 30 secunc de straufonga.
Tla categoria cuccioli femminile na bona garejeda de Anna Anvidalfarei che senza fai se à tlassificà al bon 8. post. Pra la majra mutans, la ragazze femminili, ons l podio de Nina Nocker, che cun doi fai se davania l 2. post. Quarta cun trëi fai se tlassifichea Sandra Insam. Npue plu sfortunedes la surans Tanja y Thea Wanker che ëssa fat l sgondo y terzo mieur tëmp sun i schi, ma ne à nia abù l dré dì a stlupeté. Nstësc i trainadëures se à rot l cë per abiné ora la gaujes, sce persuneles dla atletes o per via dl stlop, ma n ne ie nia ruei a na conclujion. Ënghe Vera Ploner à fat na gara positiva ruvan 17. cun cater fai.
Pra i mutons dla medema età drët na bona gara de Leon Mussner che cun n stlupeté a puntin se à trat inant al bon 8. post. Dodicejimo ie ruvà Aaron Galiani cun 5 fai y sedicejimo Leo Piazza cun 6 fai.
Per la proscima garejedes sperons che la bute inò sciche sënza a stlupeté po ons udù che pudon punté a resultac scialdi positives. Per n valgun de chisc atlec sarà la proscima garejedes la segonda pert di campionac talians a Tesero; i autri jirà inant cun l ultima garejeda dl Leitgeb-cup tla valeda de Pfitsch. (ts)
