03/03/2016
Camp. Talians a Bionaz
Elia Demetz campion talian ragazzi
I atlec de nosc sciclub sá da se la fé valëi
N sada ai 27 de fauré y n dumënia ai 28 de fauré iel stat tla Val d’Aosta doi garejedes de biathlon che valova per Campiunac Talians y plu avisa na garejeda individuela y na stafëta.
L Schiclub Gherdëina à tëut pert a chisc campiunac cun set atlec che ie unic acumpaniei da si trainadëur Samuel Mussner. Duc i atlec de nosc schiclub à fat na bela paruda dajan dut chël che i fova boni.
Da auzé ora iel la vënta de Elia Demetz tla categuria “ragazzi”. Elia à venciù l titul de Campion Talian se desmustran drët segur a tré tl scies: nianca un n iede àl trat dlongia via. Elia ie al mumënt propi te na boniscima forma.
N boniscimo cuarto post ie nce unì ajont da Sophia Planker, for tla categuria “ragazzi”. Samira Major à arjont tla medema categuria l 35° post. Da muië iel che Denise Planker, che via per l inviern à bele venciù deplù garejedes, ne n’à nia pudù tò pert ala garejeda, ajache la ne se n stajova nia drë bën.
Michael Riffeser à arjont n bon otavo post tla categuria “allievi” falan vel colp de massa. Pra la mutans dla medema categuria à Linda Nocker arjont l 12° post y Gaia Brunello l 13° post.
N dumënia nevovel sche l ciel fossa stat daviert, ma n messova mpo garejé. L fova da fé la stafëtes y nosc atlec ie unii metui adum cun autri atlec dl Südtirol. Gaia s’à tlassificà bona cuarta, Linda sesta tla categuria allievi y Michael Riffeser setimo pra i mutons. Tla categuria “ragazzi” à Sophia Planker arjont l bon cuarto post y Samira Major s’à tlassificà otava. Pra i mutons dla medema categuria à Elia Demetz arjont l terzo post. Per duc i mutons y la mutans che à tëut per a chësta garejedes iel sta de biei dis, dalonc da cësa ma te na bela cumpania. (fl)
