biathlon

18/03/2019

Atlec mo scialdi n forma pra l „Dreiländervergleichskampf“

Atletes de Gherdeina porta a cesa 3 bedaies

Coche bel l inuem l dij, ie l „Dreiländervergleichskampf“ na garejeda danter i trëi raions dl Bayern, Tirol y Südtirol. Leprò coche nviei ite ie nce i concurënc dla Svizra. Chësta garejeda vën urganiseda a rotazion danter i raions, chëst’ann te Südtirol, tla valeda de Pfitsch.
Coche n possa se nmaginé, ruva tlo adum scialdi de bon atlec y uni raion possa me mandé si 5 miëur atlec per uni categoria. L Schiclub Gherdëina à chëst’ann, do na bona sajon, pudù mandé bën 7 atlec: Aaron, Galiani, Alex Fontana, Nina Nocker, Samuel Ploner, Sandra Insam y Tanja y Thea Wanker.
Sambën che do i ultimi bon resultac se oven fat vel speranza y bel npont, bele l prim dì pra la garejeda ndividuela cun trëi iedesc stlupeté, ti ie Tanja Wanker stata a duta si concurëntes dla categoria U12, cun me 2 fai y l quarto mieur tëmp sui schi. Riesc do al segondo post cun l mieur tëmp de categoria, ma un n fal de plu se à plazà Nina Nocker. Sciot per Thea Wanker che ëssa fat l segondo mieur tëmp sui schi, ma à purtruep chësc dì falà 8 colpsc.
Sandra Insam ie tla categoria U13 rueda bona sesta, Aaron Galiani y Alex Fontana ie ruei sesto y settimo tla U12 mutons y Samuel Ploner undicejimo tla U15.
Ënghe l segondo dì, tla garejeda sprint ala dassën butà. Tlo à Nina Nocker nuzà si forma sun i schi vencian te si categoria cun me un n fal. Mo miec ëssela pudù ji sce Thea y Tanja ëssa tucà povester ënghe me un n colp de plù; ëiles se à tlassificà bona quarta y quinta, ma n podio dut de Gherdëina foa nia dalonc.
Sandra Insam ie inò rueda sesta cun doi fai, ntan che Aaron Galiani ie ruà a n sofl dal podio cun un n fal. Alex Fontana ie ruà settimo y Samuel Ploner dodicejimo de si categoria.
Nscì ie per chisc atlec dl biathlon la sajon fineda via y l resta me plu de se musrè pra la gara dl schiclub. L ie stat scialdi na bela sajon cun de bon resultac ulache l schiclub Gherdëina, cun si puec mesums, ti pudova te vel categoria nce ti sté permez ala gran sozieteies dl biathlon de nosta provinzia. Na lauda ti va per prim al gran mpëni di atlec, ai genitoresc, ma n particuler ala sezion dl pudejé che à anjiniá ca i atlec tan bën y nia per ultimo al cunsëi che nes sustën te uni bujën. Nscila ne possen nia auter che avëi legrëza a fé i trainadëures. ts

Sponsor

Raiffeisen Gherdeina
ITC Raetia sezion Sport GherdëinaCentro Fondo S.Cristina

Foto

Facebook