15/02/2017
Alexia Runggaldier sul podio pra i Mondiali a Hochfilzen
La jëuna de 25 ani de S. Cristina, muta de Ossi y Sigrid de “Mëujna”, vënc la bedaia de bront pra i campionac de biathlon a Hochfilzen tl’Austria. Che Alexia fova tla forma de si vita oven bele udù pra la garejedes te Antholz, ulache tla garejeda “individuela”ovla arjont l terzo post, n plazamënt che deguni ne s’ëssa aspità. Sëuraprò fovla monce deventeda bona sesta tla Mass Start.
Cun si bedaia de bront pra i campionac dl mond de Hochfilzen à Alexia desmustrà te pudëi tenì pea cun l’elite mondiela dl biathlon. Alexia, che se cunësc se nstëssa miec de duc y che sà avisa che si bona cualiteies tl stlupeté vën premiedes dantaldut pra la garejeda “individuela”, fova perchël n chël di dassënn motiveda. Pra garejeda individuela iel da stlupeté cater iedesc (cin colps), doi iedesc mpe y doi iedesc a ventrons. Per uni colp trat da na pert via vëniel juntà leprò n menut al tëmp de garejeda y perchël sce tla prima sezion dl stlupeté stlupetea n atlet doi iedesc da na pert via, ie si garejeda belau tan che fineda. Alexia ne n’à trat nianca no n iede da na pert via, l’à tucà duta la vint “chertes”. Mé trëi atletes sun 99 à tucà dut sche Alexia.
Chësta sort de garejeda, ulache l ie nce da pudejé per bën 15 km, ie la garejeda che mostra su tlermënter chi che ie stersc mentalmënter, chi che ie boni de ne tenì nia plu che n tant cont de chël che suzed ntëur via. De chësc viers ie Alexia dassënn sterscia, mé che la va pa nce de pudejé, coche dit. Propi tl pudejé, dij si trainadëures y exatlec, s’àla miurà de n zaron. Mé nsci iel mesun tenì pea cun la miëures dl mond. Y la miëures dl mond fova n chël di, ai 15 de fauré, cun ëila sun l podest: Laura Dahlameier( or) y Gabriela Koukalova (arjënt). L boniscimo 9°post arjont pra la Mass Start ai 19 de fauré ie mpue jit sot a chësta maniera.
La bedaia de bront arjonta da Alexia ie na bedaia che duc ti cunsënt de cuer, no mé i siei de familia, ajache te si vita da sportiva de aut livel àla nce abù de rie mumënc y da vel tecnich ne univela nianca plu tëuta n cunscidrazion. Mé ëila à for credù te se nstëssa y ala fin ti à i resultac dat rejon. Speron che chësc bon resultat ti debe la forza de jì inant nce a d’autri atlec che ie al mumënt te na situazion critica. Sëuraprò iel da se mbincé che la bedaia de Alexia feje crëscer l entusiasm danter nosc pitli atlec y ai trainadëures dl Schiclub Gherdëina y porte pro a n majer recunescimënt dl biathlon n generel te Gherdëina.
Florian Lardschneider (Schiclub Gherdëina)
