04/04/2017
Trofeo Pinocchio sugli sci 2017
26 mutons dl schi club al Abetone
L "Pinocchio" ie una dla garejedes plu mpurtantes a livel naziunel per mutons danter i 8 y 16 ani. Dai 25 ai 29 de merz se á 1.500 atlec mesurá danter la portes dl slalom lerch sun l purtoi Zeno Coló al Abetone. A pensé ala temperatures autes te chisc dis, fovel dessegur nia saurí a fé a jí na garejeda cun tan de mutons, ma sciche uni ann univel trat sel, n metodo per fé ndurí la neif.
Tla categuria cuccioli 2 á Patrick Comploi arjont n bel cuinto post cun me 44 centejims dal prim, Francesco Guerinoni (UBI Banca Goggi).
Tla categuria allievi á la giuria fat ora, che me i primes 30 dla prima manche pudova pié via tla segonda. Nscila ie dala mutans Nicole Nogler Kostner ruveda 13. y Jamie Lee Pellizzari 24, Valentina Savorgnani dl Skicollege Veneto á venciú cun plu de un segund dan Nina Bachmann y Carole Agnelli. Dai mutons fova Matteo Bendotti dl Radici Group l plu asvelt, vencian dan Alberto Battisti y Matteo Noris. Sebastian Demez á arjont l 22 plazament y Matteo Grossrubatscher ie deventá 27.
I mieur resultac dl Schi Club Gherdeina á arjont i "ragazzi" nasciui tl ann 2003-2004. Dala mutans á venciú Beatrice Sola dl Agonistica Trentina cun n temp de 1'05.20. Ellis Pellizzari (1'05.83) fova me 15 centejims dalonc dal podio, se plazan nscí al cuinto post. Cun l numer bendebot aut 103, se á nosta campiunessa provinziela Hanna Wanker tlassificá al bon 13. post cun n temp de 1'06.76; Nicole Ploner ie 30.
Danter i 200 mutons ie Julian Runggaldier deventá 25., Max Perathoner 11. y Marc Comploj 9. Diego Nogler Kostner ie n mut che canche la conta, po iel suvenz tra i plu strampsc. Chest' iede fovel cun n temp de 1'04.53 cuarto te si categoria. Edoardo Saracco dl Equipe Limone á venciú (1'03.29) y a Diego ti manciova me 5 centejims per l podio. Chesc bon plazament ti á permetú de se cualifiché ala fase nternaziunela dl Pinocchio.
Per chesta fineles dl Pinocchio ie ruvei capró atlec boni y manco boni de ben 36 nazions de dut l mond. Dal Neuseeland al Canada, dal Japan al Brasil, dala Russia al Island, dal Zypern ala Lituania; nsciuma na gran mesceida de cultures desfrenties che se anconta y se mesura sun i purtoies dl Abetone.
L dí dan la prima garejeda á duc i mutons dla categuries U14 y U16 teut pert ala sfileda dla nazions tl zenter dl luech. Na banda de mujiga de saudeies dl Esercito acumpaniova i mutons sun la plaza zentrela ulache la festa ie mo jita baiter. N grum de spetadeures fova nteur ite y l'atmosfera fova veramenter bela.
Diego cufá a man dreta
N venerdí ai 31 de merz fova l prim di dla garejedes nternaziuneles. Tl slalom strent che fova lonch n menut y ova 66 portes á Diego fat na dret bona garejeda se plazan al 7 post. Venciú á inó Edoardo Saracco cun n gran destach da duc i autri, sciche dala mutans dla medema categuria á fat Dzenifera Germane dla Lettonia. Dai allievi á venciú Rebeka Oblak dla Slovenia dan Valentina Savorgnani y dai mutons Matteo Bendotti dan Joshua Sturm dl Austria.
N sada fova l slalom lerch l ultima garejeda dl Pinocchio. Diego messova sciche l dí dant pie via cun l penultimo numer. La neif fova mo te bona cundizions y nscí fova l mut ambizieus de Santa Crestina bon de arjonjer l boniscimo 6 post. Bravo Diego!
Edoardo Saracco á venciú enghe chesta garejeda. Stefano Pizzato dl SC Druscié Cortina ie deventá segondo y Johannes Passrugger dl Austria terzo. Dala mutans á enghe inó venciú la granda (1,80 m) Dzenifera Germane. Dai allievi fova sul scialier plu aut dl podio Valentina Savorgnani y Matteo Bendotti, che adum cun Saracco á venciú duta la 4 garejedes nternaziuneles danter l Trofeo Pinocchio y Topolino.
Resultac Pinocchio Nazionale:
Resultac Pinocchio Internazionale:
La sajon dla categuries ragazzi/allievi se stluj jú cun i campionac taliani a Pila (Aosta) dal 10 al 14 de Auril.