09/12/2019
Slalom FIS di jëuni y Marlene Cup te Sulden
Per i atlec de Gherdëina ie la sajon 2019/20 pieda via cun n drë sgors
Dó de bela garejedes bel de nuvëmber ulache ie da ti fé i cumplimënc a Matteo Grossrubatscher, che à arjont n 2. y 4. plazamënt te doi garejedes NJR de slalom lerch te Sulden, ie states chësc ultimo fin dl ena 2 slaloms, for FIS di jëuni inó a Sulden. Un de chisc á valù per la tlasifica dl Marlene Cup,
Da auzé ora ie i beliscimi risultac de Max Malsiner che à venciú l prim slalom de n sada y che ie ruvá segondo n dumënia. Enghe Max Perathoner, che fej l prim ann garejedes FIS à musrà cie che l vel. Tla prima garejeda àl fat tla segonda manch l mieur tëmp de duc. Rafael Leitner ie pona mo ruvà 5. y Matthias Comploj 7. Tl 2. slalom che valova per l Marlene Cup udons sun l podest 1. Max Malsiner y segondo Matthias Comploj.
Pra la mutans à n sada venciù Emmi Frenademez dl Schi Club Ladinia, la mieura dla mutans dl Schi Club Gherdëina ie stata Gaby Hofer, che purtruëp ie tumeda ora tl segondo slalom. Vicky Bernardi dl SC Ladinia ie ruveda 14 y la mieura de chëles che ie l prim an te chësta categuria ie stata tramedoi dis Nicole Ploner cun n bel 15. plazamënt de dutes tl segondo slalom.
L Schi Club Gherdëina Raiffeisen à cun chisc biei plazamënc nscí ënghe venciú tla garejeda Slalom Marlene Cup la tlassifica di schi clubs.
