01/08/2018
SE ALENÉ D'INSTÀ
Les Deux Alpes - Francia
Ënghe d’instà fej l Schi Club Gherdëina Raiffeisen na gran atività danter alenamënc a sëch y sun i schi.
N vënerdi ai 20 de lugio ie trei pulmini cun i mutons y la mutans dla categoria allievi 2003-2004 y la scuadra nueva dl “Schülerkader” furnei cun i trainadëures dl Schi Club Gherdëina Michaela Messner y Markus Frasnelli de vieres dla Francia, a Les Deux Alpes per se alené sun la nëif dl dlacier.
La grupa nueva dl comitato dl Adej Aut, l “Schülerkader”, ie metú adum da 16 atlec y doi trainadëures. De chisc atlec ie bën 6 dl Schi Club Gherdëina: Ellis Pellizzari, Chayenne Kostner, Elena Frontull, Max Perathoner, Marc Comploj y Gianluca Testa.
L viac fova lonch, ma l se à paià. La condizions dla nëif fova drët bones y ënghe l tëmp a judà pea.
Domesdi fovel sun l prugram nia me l alenamënt a sëch, cun danter l auter na bela jita a pé tla Val Venosc, ma l univa pità n grum de ativiteies, sciche ënghe downhill cun la roda.
Chisc 5 dis tla Francia ti à sapú scialdi bel ai mutons y ala mutans dl Schi Club Gherdëina che ie ruvei a cësa stanc ma cuntënc.
