alpino

15/04/2015

GranPremio Giovanissimi - Ellis ie campiunëssa taliana, Diego terzo

resultac de marueia per l Schi Club Raiffeisen Gherdëina

 

Tl ultimo fin dl ena à 1200 mutans y mutons dla categuries cuccioli y baby tëut pert ala finela dl Gran Premio Giovanissimi al Aprica tla provinzia de Sondrio. Te chësta garejeda che ie una dla, sce nia la plu mpurtanta de dut l ann, à i atlec de Gherdëina fat udëi, che i à mo assé energies per vester danter i plu asvelc de duta la Talia.

 

 

N sada tucovla ala mutans y ai mutons dl ann 2003 a se bater danter la portes dl slalom lerch. Cun l medemo temp de 52,42 venc Margherita Parodi(Sestriere) y Alessia Vaglio(Mottarone) la gara y cun 53,47 stluj Nicole Ploner ju na sajon drët garateda sul 9.post; Laura Senoner arjonj l 19. plazament(55,06). Nia tan butà ti ala a Hanna Wanker, Chayenne Kostner y Lena Prinoth, che se plazea nteur al 50.post. Dai mutons iel da auzé ora la prestazion stramba de Diego Nogler Kostner, che arjonj l boniscimo terzo post cun 52,55 secunc, a nianca n secunt da Francesco Zucchini(Valtorta) che á venciú la garejeda. Ntan duc i alenamenc da d'inviern dejmustrova Diego na gran grinta y pascion per si sport y finalmentër se ala paià a se purvé tan da bestia.

 

L plu bel vën sciche n dij ala fin y nscì iel ënghe stat. N dumenia ai 12 de auril davania Ellis Pellizzari l titul de campiunëssa taliana cun n tëmp de 53,81; Rebecca Gnesi dl Versilia Ski ie segonda cun belau n secund de ritardo. La gara dl ann à ënghe fat Sara Thaler, che à arjumà per l fruz de 2 centejims l podio. Si gran quarto post ie l resultat de l'ulentà y mpëni che la dejmostra uni di. Stefanie Rella ie sul 28. post y Elena Frontull, che fova per fé n bon temp, á fat n gran fal ala fin dla garejeda y ie tumeda plu zeruch.

 

I mutons nasciui tl ann 2004 se á fat valëi cun trei plazamenc ti prims 30. Venciú a Pietro Motterlini de Madesimo cun n tëmp de 53,67. Marc Comploj ie 11.(56,21), Peter Nocker 14.(56,38) y Gianluca Testa 28.(57,85).

 

 

Nscì fina inò via n'autra sajon da d'inviern cun ngrum de suzesc per i mutons dl Schi Club Raiffeisen Gherdëina. N gran die ve l paie va a duc i genitores, trainadeures y sponsores che cëla for de fé dut acioche nosc atlec à na gran legrëza y pascion per si sport. N bon instà a duc!

 

tlassifica cuccioli 2003

tlassifica cuccioli 2004

 

 

 

Sponsor

Raiffeisen Gherdeina
ITC Raetia sezion Sport GherdëinaCentro Fondo S.Cristina

Foto

Facebook