17/12/2018
Garejedes nazioneles MEMORIAL FOSSON 2018
Vëntes per Chayenne Kostner y Hanna Wanker
Dal 11 al 13 de dezëmber iel stat a Pila (Aosta) la garejedes per l Memorial Fosson.
L fova bele la 9^ edizion de chësta bela manifestazion, ulache l garejea nia uni un per si cont, ma na grupa de atlec metuda adum da 6 ragazzi y 6 alievi garejea per si scuadra.
Chëst’ann à l Schi Club Gherdëina tëut pert ala gares cun doi grupes. Duc se à purvà dassënn.
L tëmp fova scialdi bel y i purtoies fova anjeniei ca a puntin.
N dut al tëut pert 87 squadres de duta la Talia cun bën 570 atlec y 150 trainadëures.
N valguni de nosc atlec ie stai boni de arjonjer plazamënc sun l podest, sciche:
Chayenne Kostner che á venciú l prim slalom lerch y l parallel
Hanna Wanker á venciú l segondo slalom lerch y fova segonda tl slalom strënt
Max Perathoner fova segondo tl slalom strënt
Sara Thaler se á plazá al terzo post tl slalom strënt
La prima scuadra dl Schi Club Gherdëina Raiffeisen ie stata bona de vëncer la tlassifica a scuadres se purtan a cësa n bel pulmino sponsorisà dala VW per n ann y n premio de 2000 Euro dl Energiapura per l Club.
Al segondo post ie ruvà l Golden Team Ceccarelli y terzi fova la segonda scuadra dl Schi Club Gherdëina, dan n grum de autra squadres drët bones!
L viac fova drët lonch y i dis de gara fova lonc y sfadieusc, ma per i atlec y i trainadeures iel stat na beliscima esperienza y na gran sodisfazion.
